Զարիֆը Ղազախստանում հանդիպել է ՄԱԿ-ի գլխավոր քարտուղարի հետ
Ղազախստանի մայրաքաղաք Աստանայում կայացած «Աստանա Էքսպո-2017» համաշխարհային ցուցահանդեսի շրջանակներում հանդիպել են Իրանի ԱԳ նախարար՝ Մոհամմեդ Ջավադ Զարիֆը և ՄԱԿ-ի գլխավոր քարտուղար՝ Անտոնիո Գուտերեշը: Այս մասին հայտնել է IRNA լրատվական գործակալությունը:
Հանդիպման ժամանակ նշելով, որ արաբական երկրների միջև խոր ճգնաժամ է առաջացել, Անտոնիո Գուտերեշն ասել է. «Այս տարաձայնությունների կարգավորման միակ ելքը երկխոսությունն ու բանակցությունն է»:
Հաստատելով Իրանի իսլամական հանրապետության կողմից Համատեղ գործողությունների համապարփակ ծրագրի կետերի իրագործումը, ՄԱԿ-ի գլխավոր քարտուղարն ասել է.«Այս կազմակերպության պաշտոնական դիրքորոշումը ՀԳՀԾ-ի ոգուն ու բովանդակությանն աջակցելն է»:
Դատապարտելով հունիսի 7-ին Թեհրանում տեղի ունեցած ահաբեկչական գործողությունները, Անտոնիո Գուտերեշը զորակցություն է հայտնել Իրանի կառավարությանն ու ժողովրդին:
Զարիֆը և Գուտերեշը նաև բանակցել են տարածաշրջանային հարցերի, այդ թվում՝ Սիրիայի , Իրաքի ու Եմենի ճգնաժամի շուրջ:
