Կանգնեցրե՛ք Թուրքիային. Սիրիայի քրդերն օգնություն են խնդրել ԱՄՆ-ից

Սիրիայի քրդերի «Դեմոկրատական միություն» կուսակցության (PYD) համանախագահ Սալիհ Մուսլիմն ԱՄՆ-ից օգնություն է խնդրել թուրքական ԶՈւ-ի հարձակումները զսպելու համար, գրում է թուրքական haberler.com կայքը:

«Կանգնեցրե՛ք Թուրքիային», - ասել է Մուսլիմը՝ խոսելով քրդական դիրքերի վրա թուրքական ԶՈւ-ի վերջին հարձակումների մասին:

Հիշեցնենք, որ օրեր առաջ թուրքական ԶՈւ-ն հրթիռակոծության է ենթարկել սիրիական Աֆրին շրջանը, որը գտնվում է քրդական ուժերի հսկողության տակ:

Լրատվամիջոցները հայտնում են, որ Մուսլիմը Թուրքիայի դեմ անհրաժեշտ զսպող քայլեր ձեռնարկելու համար դիմել է անձամբ ԱՄՆ նախագահ Դոնալդ Թրամփին:

Հիշեցնենք, որ ապրիլի 25-ին թուրքական ԶՈւ-ն օդային հարվածներ է հասցրել Սիրիայի հյուսիսային շրջաններին, որի հետևանքով մահացել է Սիրիայի տարածքում գործող քրդական ազգային ինքնապաշտպանության ջոկատների 18 մարտիկ:

Ավելի վաղ ԱՄՆ նախագահ Դոնալդ Թրամփն ընդունել է Սիրիայի տարածքում գործող քրդական ջոկատներին զենք տրամադրելու մասին որոշումը, որը խիստ հակազդեցության է արժանացել Թուրքիայում:

Tert.am