Սիրիացի պաշտոնյա. «Սիրիայի բանակը պետք է մուտք գործի Ռաքքա»
Սիրիայի տեղեկատվության նախարարը հայտարարել է, որ այդ երկրի կառավարությունը միայն այն ժամանակ Սիրիայի հյուսիսային Ռաքքա քաղաքն ազատագրված կհամարի, երբ բանակը մտնի այդ քաղաք:
Ռաքքա նահանգի կենտրոն և Սիրիայում ԻԼԻՊ ահաբեկչական խմբի հիմնական ու կենտրոնական հենակետը համարվող Ռաքքա քաղաքը, հոկտեմբերի 17-ին անցավ սիրիացի քուրդ ուժերի լիարժեք վերահսկողության տակ:
Սիրիայի տեղեկատվության նախարար Մոհամմեդ Ռամզ Թարջոմանը երկուշաբթի օրը «Սպուտնիկ» լրատվական գործակալությանը տված հարցազրույցում ասել է. «Սիրիայի կառավարությունն ազատագրված է համարում միայն այն տարածքները, որտեղ մուտք են գործել բանակի ուժերն ու դրա շենքերի վրա ծածանվում է երկրի ազգային դրոշը»:
«Ռաքքայից ԻԼԻՊ-ի անդամների հեռացումը դրական է, սակայն անհրաժեշտ է, որ Սիրիայի ուժերն այդ քաղաք մուտք գործեն և այդտեղից հեռանան ԻԼԻՊ-ը և ահաբեկչական մյուս խմբերը»,-հայտարարել է Սիրիայի տեղեկատվության նախարարը:
Սիրիայի տեղեկատվության նախարարը Թուրքիայի զինվորական ուժերի Սիրիայի հյուսիս-արևմտյան Իդլիբ մտնելը, ինչպես նաև «Ալ-Թանֆ»-ում սահմանային այլ տարածքներում ամերիկացի զորայինների ներկայությունը համարում է բացահայտ ոտնձգություն, որը ոտնահարում է Սիրիայի ազգային ինքնիշխանությունն ու միջազգային օրենքները և դուրս է Աստանայի նստաշրջանում ձեռք բերված համաձայնությունների շրջանակից»:
