Սիրիայի բանակը լայնածավալ հարձակման է անցել Իդլիբում
«Սիրիայի կառավարության ուժերը ռուսաստանյան օդուժի աջակցությամբ շարունակում են հարձակումն Իդլիբի,- բրիտանական The Times հանդեսում գրում է թղթակից Ռիչարդ Սփենսերը:
«Ամենահաջողակ ասադյան հրամանատար Սուհել Ալ-Հասանի գլխավորած ուժերն արդեն գրավել են մի քանի առանցքային քաղաքներ եւ գյուղեր: Իդլիբը Սիրիայի կառավարության ընդդիմադիրների ամրոցներից էր, իսկ հիմա նահանգը վերահսկում է զինյալների տարատեսակ խմբերի խռովարար կոալիցիան, որը ղեկավարում է «Հայաթ Թահրիր ալ- Շամը»՝ «Ալ-Քաիդայի» նախկին մասնաճյուղը՝ հայտնի որպես «Ալ-Նուսրայի ճակատ»: Քիչ հավանական է, որ ինչ-որ արտաքին ուժեր կգան նրանց օգնության»,- նշվում է հոդվածում:
«Ասադի կառավարական բանակը գրավել է Սինջար քաղաքը, եւ հիմա նրանք տասը մղոն հեռավորության վրա են գտնվում զինյալների Աբու-Դուհուր ռազմաբազայից»,- տեղեկացնում է թղթակիցը:
«Ենթադրվում է, որ Իդլիբը լինելու է դեէսկալացիայի չորս գոտիներից մեկը: Միեւնույն ժամանակ Դամասկոսի մոտ ընթանում է կատաղի պայքար, Սիրիայի բանակը մտադիր է իրականացնել վերջնական հարձակում եւ ետ գրավել ամբողջ երկիրը: Հնարավոր է, վերջին հերթին գործը կհասնի Դերա քաղաքի շուրջ գտնվող գոտուն, որը գտնվում է Հորդանանի եւ Իսրայելի սահմանին»:
Իդլիբում Սիրիայի բանակին օգնում է այն փաստը, որ մշտապես պառակտված զինյալների խմբերը պատրաստ են հարձակվել իրար վրա: Թուրքիան հասկացրել է, որ աջակցելու է միայն «Հայաթ Թահրիր ալ-Շամի» հետ կապ չունեցող խմբավորումերին, եւ հիմա Իդլիբում նրա խաղաղարար ջանքերը գլխավորապես կայանում են սահմանների պաշտպանության եւ քուրդ ապստամբներին հետեւելու մեջ:
