Թուրքիայի զեկույցն Իրաքում իրականացրած եռամսյա ռազմական գործողությունների վերաբերյալ

Թուրքիան հայտնել է վերջին երեք ամիսների ընթացքում Իրաքի հյուսիսային հատվածում Քուրդիստանի աշխատավորական կուսակցության (PKK) 290 անդամների սպանության մասին։

Թուրքիան PKK-ին ներառել է ահաբեկչական խմբավորումների ցուցակում և Իրաքից բացի, այս կուսակցության դեմ պայքարի պատրվակով թիրախավորում է նաև Սիրիայի հյուսիսը։ Սիրիայի իշխանություններն ու ժողովուրդը նույնպես բազմիցս բողոքել են թուրքական բանակի ռազմական գործողությունների դեմ։

Վերջին օրերին թուրքական բանակի հարձակումների ժամանակ իրաքցի խաղաղ բնակիչների սպանությունը բողոքի լայն ալիք է բարձրացրել Իրաքում: Թուրքիայի ռազմական գործողությունների դեմ բողոքել են Իրաքի կառավարությունն ու ժողովուրդը: Իրաքը Թուրքիայի ռազմական գործողությունների վերաբերյալ իր բողոքն է ներկայացրել ՄԱԿ-ի Անվտանգության խորհրդին։

Անատոլու լրատվական գործակալության հաղորդման համաձայն, Թուրքիայի պաշտպանության նախարարությունը շաբաթ օրը հայտարարել է, որ երեք ամիսների ընթացքում իրականացված գործողության ընթացքում սպանվել է 290 ահաբեկիչ, և  ոչնչացվել  PKK-ի 330 թաքստոց։

Չորեքշաբթի կեսօրին Դոհուկ նահանգի Զախո քաղաքի հանգստավայրերից մեկի վրա  Թուրքիայի հրետանային հարձակման հետևանքով զոհվել է  Իրաքի 9 քաղաքացի, ևս 22-ը վիրավորվել են։

Իրաքցիներն այս հարձակման դեմ բողոքի ցույցեր են անցկացրել  Բաղդադում Թուրքիայի դեսպանատան դիմաց։