Պեսկով. Բանակցություններում Ռուսաստանը երբեք չի հետևում ուրիշների պայմաններին
Կրեմլի Խոսնակ Դմիտրի Պեսկովը հայտարարել է, որ Մոսկվան բանակցություններում չի հետևում ուրիշների պայմաններին:
Sputnik-ի փոխանցմամբ՝ պատասխանելով «Կիևի պայմաններով բանակցություններ վարելու Մոսկվայի պատրաստակամության մասին» հարցին, Պեսկովն ասել է. «Ռուսաստանը երբեք չի հետևել ուրիշների պայմաններին և որոշումներ է կայացնում միայն իր նպատակների և ողջախոհության հիման վրա»:
Ավելի վաղ Ուկրաինայի իշխանություններն առաջարկել էին մինչև փետրվարի վերջ, ՄԱԿ-ի գլխավոր քարտուղար Անտոնիո Գուտերեշի ներկայությամբ, կազմակերպությունում անցկացնել «խաղաղության հանդիպում»:
Սակայն ուկրաինացիները նշել էին, որ Ռուսաստանը հանդիպմանը կարող է մասնակցել միայն «անհապաղ միջազգային դատավարությունից» հետո: Ուկրաինան նաև պահանջել է Ռուսաստանին հեռացնել ՄԱԿ-ից, սակայն կազմակերպության կանոնադրության համաձայն դա անհնար է, քանի որ Մոսկվան ԱԽ-ում ունի վետոյի իրավունք:
Ուկրաինայի ԱԳՆ կայքում երկուշաբթի օրը հրապարակված հաղորդագրության մեջ ասված է. «Ուկրաինան ՄԱԿ անդամ երկրներին խնդրում է վերանայել կազմակերպության կանոնադրությունը՝ կապված ՌԴ անդամակցության օրինականության հետ և այդ երկրին հեռացնել ԱԽ-ից և կասեցնել ՄԱԿ-ին այդ ե րկրի անդամակցությունը»:
