Էրդողանը հայտարարել է նախագահի պաշտոնը ժողովրդավարական ճանապարհով լքելու պատրաստակամության մասին
Թուրքիայի նախագահ Ռեջեփ Թայիփ Էրդողանը հայտարարել է, որ պատրաստ է հեռանալ նախագահի պաշտոնից, եթե պարտվի մայիսի 14-ին նշանակված ընտրություններում․ գրում է ՏԱՍՍ-ը։
«Մենք Թուրքիայում եկանք իշխանության դեմոկրատական ճանապարհով: Եթե մեր ժողովուրդն այլ բան որոշի, ապա մենք կանենք այն ամենը, ինչ անհրաժեշտ է ժողովրդավարության համար: Մենք օրինական կհամարենք ընտրությունների ցանկացած արդյունք»,- ասել է Թուրքիայի ղեկավարը ընտրություններից երկու օր առաջ թուրքական լրատվամիջոցներին տված հարցազրույցում։ Միաժամանակ Էրդողանը վստահություն է հայտնել, որ «թուրք ազգը կաջակցի իրեն և իր «Արդարություն և զարգացում» կուսակցությանն այս կիրակի անցկացվելիք ընտրություններում»։ Նշենք, որ Թուրքիայի նախագահական ընտրությունները նշանակված են մայիսի 14-ին։ Երկրի ներկայիս նախագահ Ռեջեփ Թայիփ Էրդողանը և ընդդիմության առաջնորդ Քեմալ Քըլըչդարօղլուն համարվում են պետական բարձրագույն պաշտոնի գլխավոր հավակնորդները։ Առաջին փուլում հաղթելու համար անհրաժեշտ է հավաքել ձայների 50%-ը՝ գումարած մեկ ձայն։ Հակառակ դեպքում երկրորդ փուլը կկայանա մայիսի 28-ին։ Վերլուծաբանները չեն բացառում, որ Թուրքիայում ընտրությունները կանցկացվեն երկու փուլով։
factor.am
