«Դուք մարդասպաններ եք»․ սիոնիստ զբոսաշրջիկներին վտարել են իսպանական ռեստորանից
Իսպանիայում ութ սիոնիստ զբոսաշրջիկներին ռեստորանից դուրս հրավիրելու և ռեստորանի տիրոջ կոշտ վերաբերմունքը աջակցության մեծ ալիք է բարձրացրել աշխարհում։
Գազայի պատերազմի նկատմամբ եվրոպացիների զայրույթի աճին զուգահեռ, Իսպանիայի հյուսիս-արևմուտքում գտնվող Վիգո քաղաքի փոքրիկ ռեստորանն անսպասելիորեն հայտնվել է հանրության ուշադրության կենտրոնում։
Ռեստորանի սեփականատերն, ի նշան բողոքի դուրս է հրավիրել մի խումբ իսրայելցի զբոսաշրջիկների։
Հղում անելով Fars գործակալությանը, Pars Today-ը հաղորդում է, որ սոցիալական ցանցերում հրապարակվել է տեսանյութ, որտեղ երևում է, թե ինչպես է Mimasa ռեստորանի տնօրենը հրաժարվում սպասարկել ութ իսրայելցի զբոսաշրջիկների և, նրանց հետ շփվելիս, բացահայտ արտահայտում իր դիրքորոշումը Գազայի հատվածում տեղի ունեցող իրադարձությունների վերաբերյալ։
Նա ասում է․-Դուք սպանում եք պաղեստինցիներին, գնացեք սնվեք Գազայում։ Մարդկանց սպանում եք, հետո՝ արձակուրդ գնում։ Դո՛ւրս եկեք այստեղից։ Նրա խոսքերի ֆոնին լսվում են ՝ «Պաղեստինն ազատ է» և «Մահ սիոնիզմին» կարգախոսները։
Չնայած սոցիալական ցանցերում զուգահեռ մեկնարկել է նաև ռեստորանը բոյկոտելու արշավ, սակայն ռեստորանատիրոջ քայլը ողջունել են մեծ թվով տեղացիներ և նույնիսկ զբոսաշրջիկներ։
Մի քանի օրվա ընթացքում ռեստորանի հաճախորդների թիվը կտրուկ աճել է։ Մարդիկ ասել են, որ գնացել են այնտեղ՝ ռեստորանի տիրոջ «մարդկային և համարձակ դիրքորոշումը» ողջունելու համար։
Ռեստորանի սեփականատերը սոցիալական ցանցում շնորհակալություն է հայտնել աջակցության համար։ Ու թեև միջադեպին անդրադարձել ու այն քննադատել են իսրայելական լրատվամիջոցներն ու սոցիալական ցանցերում Իսրայելի կողմնակիրցները, այս դեպքը վկայում է Եվրոպայում հանրային բողոքի ավելի լայն ալիքի մասին, որը բողոքում է «Պաղեստինում մարդու իրավունքների զանգվածային խախտումների դեմ»։
Վերջին շաբաթների ընթացքում եվրոպական երկրներում կոչ են անում բոյկոտել այն ընկերություններին և կառույցներին, որոնք ուղղակիորեն կամ անուղղակիորեն համագործակցում են օկուպացիայի քաղաքականության հետ։ Մինչ օրս Իսպանիայի կառավարության պաշտոնյաները որևէ պաշտոնական մեկնաբանություն չեն արել միջադեպի վերաբերյալ, սակայն փորձագետները նշում են, որ տեղի ունեցածը արտացոլում է որոշ եվրոպական երկրներում պաղեստինյան ճգնաժամի վերաբերյալ հասարակական կարծիքի աստիճանական փոփոխությունը։
Փոփոխություն, որը ներառել է նաև հանրային վայրերն, ինչպիսիք են ռեստորանները, խանութները և զբոսաշրջային վայրերը։ Այս միջադեպը ցույց տվեց, որ պատերազմի և բռնաճնշումների ստվերում նույնիսկ փոքր բիզնեսները կարող են դառնալ արդարության և համաշխարհային համերաշխության ձայնի խոսնակները։
