Բաղայի․ Իրանը դեմ է Հարավային Կովկասի գործընթացներում արտատարածաշրջանային ուժերի միջամտությանը
Իրանը դեմ է Հարավային Կովկասի գործընթացներում արտատարածաշրջանային ուժերի միջամտությանը։ Հայտարարել է ԻԻՀ ԱԳՆ խոսնակ՝ Իսմայիլ Բաղային:
Բաղային ևս մեկ անգամ հաստատել է, որ Հարավային Կովկասում տիրող իրավիճակի վերաբերյալ Թեհրանի դիրքորոշումը մնում է անփոփոխ:
«Մենք կողմ ենք Հայաստանի և Ադրբեջանի միջև խաղաղության պայմանագրի շուտափույթ ստորագրմանը։ Աջակցում ենք տրանսպորտային կապերի զարգացմանը, եթե դրանք նպաստում են տնտեսական աճին և չեն ազդում պետությունների ինքնիշխանության ու տարածքային ամբողջականության վրա, ինչպես նաև չեն փոխում տարածաշրջանի աշխարհաքաղաքական պատկերը», - հայտարարել է նա։
Դիվանագետի խոսքով՝ Հարավային Կովկասի հարցերում արտատարածաշրջանային խաղացողների միջամտությունը հակասում է տարածաշրջանի անվտանգության և զարգացման շահերին։
Նա վստահեցրել է, որ Իրանը ուշադիր հետևում է իրադարձությունների զարգացմանը և սերտ կապի մեջ է թե՛ Ադրբեջանի, թե՛ Հայաստանի հետ:
Հայաստանի ԱԳՆ Արարատ Միրզոյանը և ԱՄՆ պետքարտուղար Մարկո Ռուբիոն Երևանի «Զվարթնոց» օդանավակայանում ստորագրել են մի շարք փաստաթղթեր։ Նախաստորագրվել է Հայաստանի և ԱՄՆ-ի միջև «ԹՐԻՓՓ ուղի՝ հանուն միջազգային խաղաղության և բարգավաճման» նախագծի վերաբերյալ ռազմավարական համագործակցության շրջանակային համաձայնագիրը, ինչպես նաև ստորագրվել է Հայաստանի և ԱՄՆ-ի միջև համապարփակ ռազմավարական գործընկերության կանոնադրությունը։
Նշելի, որ Հայաստանը մտադիր է թույլատրել և աջակցել ԹՐԻՓՓ զարգացման ընկերության հիմնմանը։ Ակնկալվում է, որ ընկերությունը պատասխանատու կլինի ԹՐԻՓՓ-ի զարգացման համար՝ 49 տարի նախնական ժամկետով նրան տրամադրվող կառուցապատման իրավունքով։ Հայաստանը մտադիր է ԱՄՆ-ին առաջարկել ԹՐԻՓՓ զարգացման ընկերության 74% մասնաբաժինը և պահպանել 26% մասնաբաժինը։ Ակնկալվում է, որ այս համագործակցությունը կերկարաձգվի ևս 50 տարով՝ Հայաստանի կառավարությանը հավելյալ սեփականության տրամադրմամբ նրա մասնաբաժինը դարձնելով 49%։
