Իրանի բանակի խոսնակ․ Անհրաժեշտության դեպքում նախահարձակ կլինենք թշնամու վրա
Իրանի Իսլամական Հանրապետության բանակի խոսնակը, ընդգծելով զինված ուժերի պատրաստվածությունը ցանկացած սպառնալիքի դիմակայելու համար, հայտարարել է, որ Իրանը նախկինում ևս իրականացրել է նախահարձակ գործողություններ և անհրաժեշտության դեպքում դրանք կկրկնի՝ թշնամու ագրեսիան և հարձակումը կանխելու նպատակով։
Ինչպես հաղորդում է Pars Today-ը՝ վկայակոչելով Fars-ը, բրիգադային գեներալ Մոհամմադ Աքրամի-Նիան ասել է, որ պատերազմի փորձը, թշնամու թույլ կողմերի բացահայտումը, ինչպես նաև հրթիռային և անօդաչու թռչող սարքերի կարողությունների զարգացումը մեծացրել են բանակի պաշտպանական ներուժը, և այդ ուժը պատրաստ է դիմակայելու ցանկացած ագրեսիայի։
Նա հավելել է, որ բանակը պատերազմի ընթացքում ևս շարունակել է ռազմական տեխնիկայի և սպառազինության արտադրությունը, և այժմ, ունենալով սպառազինության պաշարներ, ավելի մեծ օպերատիվ փորձ և զինվորների բարձր մարտական ոգի, պատրաստ է պատասխանելու հնարավոր սպառնալիքներին։
Իրանի բանակի խոսնակը նաև հայտնել է հրթիռների հեռահարության, արագության և ճշգրտության բարձրացման, թիրախների բազայի թարմացման և օպերատիվ կարողությունների ամրապնդման ծրագրերի մասին՝ ընդգծելով, որ հարձակման կրկնության դեպքում Իրանի պատասխանը կլինի «ավելի հուժկու, ավելի լայնածավալ, ավելի վճռական և ավելի արագ»։
Աքրամի-Նիան թշնամու կողմից սպառազինության գերազանցության վրա հույս դնելը համարել է հաշվարկային սխալ և ընդգծել, որ տեխնիկական միջոցների գերազանցությունն ինքնին չի որոշում պատերազմի ելքը։