Հրաշքներ չեն լինում. Գուտերեշը ՄԱԿ-ի անդամներին երկխոսության կոչ է արել
ՄԱԿ-ի գլխավոր քարտուղար Անտոնիու Գուտերեշը հայտարարել է կազմակերպության անդամների հետ երկխոսության անհրաժեշտության մասին՝ տարաձայնությունների հաղթահարման համար, որոնք նախկինի պես գոյություն ունեն ՄԱԿ-ի ներսում։
«Հրաշքներ չեն լինում…, և մեզ համար մեր նպատակներին հասնելու միակ միջոցը որպես թիմ աշխատելն է»,-հայտարարել է ՄԱԿ-ի նոր գլխավոր քարտուղարն իր առաջին աշխատանքային օրը։
«Դա մեզնից մեծ ջանքեր կպահանջի, ինչպես նաև լուրջ երկխոսություն անդամ-պետությունների հետ»,-ասվում է ՄԱԿ-ի կայքում հրապարակված հայտարարությունում։ Նա հավելել է, որ շատ կարևոր է ինչպես նվաճումները, այնպես էլ կազմակերպության ձախողումները ճանաչելը։
Բացի այդ, նա ընդգծել է ՄԱԿ-ի զարգացման համակարգում բարեփոխում անցկացնելու անհրաժեշտությունը։ Գուտերեշը նաև հավելել է, որ կազմակերպությունը պետք է ջանի և ազատվի «ժողովրդավարության զսպաշապիկից»։
«Մենք չպետք է պատրանքներ փայփայենք»,-ասել է 9-րդ գլխավոր քարտուղարը ՄԱԿ-ի աշխատակիցների հետ հանդիպմանը՝ նշելով, որ առջևում դժվար ժամանակներ են սպասվում։ Նրա խոսքով՝ աշխարհում աճում է փոխկապակցված հակամարտությունների թիվը, որոնք սնում են գլոբալ ահաբեկչությունը։ «Մենք ապրում ենք աշխարհում, որում խնդիրները գլոբալ բնույթ են ստացել, և երկրները չեն կարող դրանք միայնակ լուծել»,-հավելել է նա՝ նշելով, որ միջազգային հանրությունը պետք է գիտակցի բազմակողմ հարաբերությունների սկզբունքի կարևորությունը։
1in.am
