ՄԱԿ-ը գոհ է Կիպրոսի բանակցությունների ընթացքից
ՄԱԿ-ի գլխավոր քարտուղարը գոհունակություն է հայտնել Կիպրոսի վերամիավորման բանակցություններում արձանագրված առաջընթացից:
Համաձայն «Ֆրանս Պրես»-ի հաղորդման, ՄԱԿ-ի գլխավոր քարտուղար Անտոնիո Գութերեշը հինգշաբթի օրը՝ Ժնևում նշել է, որ Կիպրոսի թրքաբնակ և հունաբնակ բաժինների վերամիավորման բանակցություններն արդյունավետ են եղել: «Այս բանակցություններում մոտեցել ենք Կիպրոսի հունաբնակ և թրքաբնակ բաժինների միջև վերջնական համաձայնությանը». ասել է նա:
«Բանակցող կողմերն ընդհանուր հարցերի շուրջ համաձայնության են հանգել, սակայն որոշ հարցերի, այդ թվում համաձայնագրի գործադրման ու նաև դրա երաշխավորման կապակցությամբ տարաձայնություններ գոյություն ունեն և դեռ վերջնական համաձայնություն չի կայացել»,-հայտարարել է Գութերեշը:
ՄԱԿ-ի գլխավոր քարտուղարը հավելել ք. «Կիպրոսի վերամիավորման բանակցություններում շտապ լուծումներ չենք որոնում»:
Կիպրոսի կղզին 1974 թվականին Թուրքիայի զինվորական միջամտությամբ բաժանվեց հունաբնակ և թրքաբնակ երկու մասերի:
Կիպրոսի թրքաբնակ բաժինը պաշտոնապես ճանաչվել է միայն Թուրքիայի կողմից, մինչդեռ հունաբնակ բաժինը ՄԱԿ-ի և ԵՄ-ի անդամ է:
