Նիդերլանդների վարչապետ.«Թուրքիայի կառավարությունը պետք է ներողություն խնդրի»
Նիդերլանդների վարչապետը Թուրքիայից պահանջել է ներողություն խնդրել:
Ինչպես հաղորդում է Ֆրանս Պրես լրատվական գործակալությունը, Նիդերլանդների վարչապետ Մարկ Ռյուտեն մարտի 12-ին այդ երկրի խորհրդարանական ընտրությունների քարոզարշավի շրջանակում հայտարարել է, որ ներողություն պետք է խնդրի ոչ թե Նիդերլանդները ,այլև Թուրքիայի կառավարությունը:
Ռյուտեն նշել է, որ Նիդերլանդները ներողություն չի խնդրի թուրք նախարարի մուտքը երկիր արգելելու համար:
Նիդերլանդների վարչապետը Թուրքիայի նախագահ Ռեջեբ Թայիբ Էրդողանից պահանջել է ներողություն խնդրել վերջերս արած հայտարարությունների համար: «Թուրքիան պետք է ներողություն խնդրի հոլանդացիներին նացիստների հետ համեմատելու համար», ասել է նա:
Թուրքիայի նախագահի խոսքն անընդունելի է և չի նպաստում լարվածության թուլացմանը, նշել է Ռյուտեն:
Նշենք,որ մարտի 11-ին, Էրդողանը Նիդերլանդների իշխանություններին «ֆաշիստներ» էր անվանել, քանի որ Թուրքիայի ԱԳ նախարար Մևլյութ Չավուշօղլուին արգելվել էր երկիր մտնել: Իսկ Չավուշօղլուն Ֆրանսիայում Նիդերլանդները «ֆաշիզմի մայրաքաղաք» էր անվանել:
Չավուշօղլուն Թուրքիայի Սահմանադրության հանրաքվեի հարցով էր մեկնել այդ երկիր: Նա պատրաստվում էր հանրահավաք անցկացնել այդ երկրում՝ ներկայացնելու Սահամանադրության փոփոխման դրական կողմերը:
Ռյուտեն նաև ասել է, որ եթե Թուրքիան «նույն ոգով շարունակի», Նիդերլանդները ստիպված կլինի պատասխան միջոցառումների մասին մտածել: Իսկ Թուրքիան Նիդերլանդներին զգուշացրել է,որ ամենախիստ միջոցներով կհակադարձի վերջինիս քայլերին:
