Ռուսաստանը պահանջել է չեղարկել Կուբայի դեմ ԱՄՆ-ի պատժամիջոցները
ՄԱԿ-ում Ռուսաստանի ներկայացուցիչը պահանջել է անհապաղ չեղարկել Կուբայի դեմ ԱՄՆ-ի պատժամիջոցները:
ՏԱՍՍ գործակալության փոխանցմամբ՝ Կուբայի թեմայով Գլխավոր ասամբլեայի նիստում, Վասիլի Նեբերնեզիան ասել է.«Կուբայի նկատմամբ ԱՄՆ-ի քայլերի հետ կապված Ռուսաստանի դիրքորոշումը չի փոխվել: Մոսկվան կտրականապես պահանջում է անհապաղ և ամբողջությամբ չեղարկել Կուբայի դեմ պատժամիջոցները»:
ՄԱԿ-ում ՌԴ ներկայացուցիչն ավելացրել է.«Շուրջ 60 տարի է, ինչ ԱՄՆ-ը բոլոր ոլորտներում Կուբայի դեմ պատժամիջոցներ է սահմանել: Միջազգային հանրության շատ երկրներ դեմ են Վաշինգտոնի այդ քաղաքականությանը»:
Ռուս բարձրաստիճան դիվանագետը Կուբայի դեմ երկարատև ու անարդարացի շրջափակումների շարունակումը համարել է երկրի ներքին գործերին միջամտություն: Ոտնահարվել են բարեկեցիկ կյանք ու տնտեսական զարգացում ապրելու համար Կուբայի ժողովրդի օրինական իրավունքները:
ՄԱԿ-ի ԳԱ-ն չորեքշաբթի օրը բանաձև ընդունելով պահանջել է դադարեցնել Կուբայի դեմ ԱՄՆ-ի շրջափակումները:
