Կարասին. Մոսկվան հնարավորինս կդյուրացնի վիզային ռեժիմը Վրաստանի հետ
Մոսկվան հնարավորինս կդյուրացնի վիզային ռեժիմը Վրաստանի հետ եւ կձգտի այն ամբողջությամբ հանել:
Այս մասին ՏԱՍՍ-ին հայտնել է պետական քարտուղար, Ռուսաստանի ԱԳ փոխնախարար Գրիգորի Կարասինը՝ Վրաստանի վարչապետի ՝ ՌԴ հետ փոխհարաբերությունների հարցերով ներկայացուցիչ Զուրաբ Աբաշիձեի հետ հանդիպման արդյունքում:
«Մենք ձգտելու ենք, որ մեր հարեւան երկու պետությունների միջեւ վաղ թե ուշ առանց վիզայի ռեժիմն ամրագրվի,- ասել է նա: - Ամեն ինչ կախված է տարածաշրջանի իրավիճակից, ահաբեկչության դեմ պայքարի համաձայնեցված գործողություններից, քանի որ տարածաշրջանը շատ զգայուն է, եւ մենք սթափություն ցուցաբերելու անհրաժեշտություն ունենք»:
«Մենք հնարավորինս կդյուրացնենք վիզային ռեժիմը,- նշել է Կարասինը: - Արդեն այժմ Վրաստանի քաղաքացին կարող է շրջագայել ՌԴ ցանկացած բնակչի հրավերով: Կարծում եմ, որ այս պահին դա լավագույնն է»:
«Վրաստանի քաղաքացիների համար վիզայի ռեժիմը հանելուն խանգարում է ոչ միայն մեր երկրների միջեւ դիվանագիտական հարաբերությունների բացակայությունը, որոնք միակողմանիորեն խզվել էին Թբիլիսիի կողմից 2008-ին: Տվյալ հարցի լուծման համար մեծ դեր ունի նաեւ այդ տարածաշրջանի անվտանգությունը: Վրաստանից ոչ հեռու տեղի են ունենում զինվորական հակամարտություններ, գրանցվել են ահաբեկիչների կողմից այդ ճանապարհով Ռուսաստանի տարածք թափանցելու փորձեր: Այդ պատճառով տվյալ իրավիճակը լուրջ քննարկումների եւ փորձագետների քննության առարկա է»,- ասել է Կարասինը:
News.am
