د افغانستان ځینې ولسوالۍ لاس په لاس شوي دي
زمونږ خبریال وايي په داسې حال کښې چې د افغانستان دفاع وزارت وايي په تیرو څلرویشتو (۲۴) ساعتونو کښې له طالبانو ډلې درې (۳) ولسوالۍ بیرته ازادې شوي دي دغه ډله هم د دریو (۳) نورو ولسوالیو د نیولو ادعا کوي .
د افغانستان دفاع وزارت وویل په تیرو څلرویشتو (۲۴) ساعتونو کښې په پکتیا ولایت کښې سید کرم او احمد اباد ولسوالیانې د طالبانو له نیواک څخه ازادې کړي شوي دي .
د افغانستان دفاع وزارت زیاته کړه حکومتي عسکرو په فاریاب ولایت کښې « اند خوی » ولسوالۍ هم له طالبانو ازاده کړي ده خو طالبان دغه ادعا نه تائیدوي .
د افغانستان پوځي او امنیتي ادارې وايي چې په ټول کښې یې تراوسه له طالبانو اته (۸) ولسوالۍ بیرته ازادې کړي دي .
خو طالبان هم په تیرو څلرویشتو (۲۴) ساعتونو کښې د څو نورو ولسوالیو د نیولو ادعا کوي .
طالبان وايي چې د فریاب ولایت قرمقول او قرغان ولسوالیانې او دغه راز په بغلان ولایت کښې یې د ګذرګاه نور ولسوالۍ مرکز له حکومتي عسکرو نیولي دي .
د افغانستان دفاع وزارت دغه راز په یوه خبر کښې وویل په تیرو څلرویشتو (۲۴) ساعتونو کښې د هیواد په بیلابیلو سیمو کښې یوسل نهویشت (۱۲۹) طالبان وژل شوي او پینځه دیرش (۳۵) نورژوبل شوي دي .
په افغانستان کښې د جنګونو په زیاتیدا سره پلازمینه کابل او یولس (۱۱) نور ولایتونه درې (۳) ورځې کیږي چې بریښنا او برق نلري .
