د بادغیس په مرکز د طالبانو د برید مخه ونیول شوه
که څه هم د افغانستان د بادغیس ولایت یو شمېر سیمهییزو سرچینو د طالبانو له لوري د دغه ولایت «قلعه نو» ښار ته د ننوتلو خبر ورکړے و، خو د دغه هېواد د کورنیو چارو وزارت بیا وایي چې د وسله والو طالبانو د بریدونو مخه یې نیولې ده.
له دغه وزارت څخه په خپره په خپره شوې خبرپاڼه کښې راغلي، افغان سرتېري د خلقو له ځان او مال څخه ساتنه کوي او همدا اوس د بادغیس ولایت په مرکز کښې ځاے پر ځاے شوي دي.
د یاد ولایت والي حسام الدین شمس هم وایي چې د ځانګړو سرتېرو له خوا د طالبانو د برید مخه نیول شوې او ګڼو طالبانو ته مرګ ژوبله اوښتې ده.
هغه د بادغیس ولایت اوسېدونکو ته ډاډ ورکړ چې په يووالي سره به د طالبانو د بریدونو مخه ونیسي.
خو په ټولنیزو رسنیو کې خپاره شوي تصویرونه ښيي چې طالبان د دغه ښار مرکز ته دننه شوي او پر زندان یې برید کړے دے.
طالبانو بیا تر اوسه د دغه برید په تړاو څه نه دي ویلي، خو په یاد ولایت کښې یې د ځینو عسکرو د تسلیمېدو خبر ورکړے دے.
