چخانسور ولسوالي د طالبانو له منګولو خلاصه شوه

د افغانستان په سویل کښې چخانسور ولسوالي حکومتي ځواکونو د طالبانو د یوې اونۍ له نیواک وروسته آزاده کړه.

د افغانستان د دفاع وزارت یو ویاندوي فواد امان وویل چې د دغه هیواد دفاعي او امنیتي ځواکونو پرون د نیمروز ولایت چخانسور ولسوالي د طالب ډلې له نیواکه خلاصه کړه او دغې ډلې ته یې درنه مرګ ژوبله واړوله.

هغه زیاته کړه چې د دغې ولسوالۍ د آزادولو په دوران کښې د طالبانو ډیرې وسلې او ګاډي د افغان پوځیانو لاس ته ورغلي دي.

له بلې خوا طالبانو ویلي چې د دغې ډلې کسانو په تیرو دوو میاشتو کښې د افغانستان کابو دوه سوه ولسوالۍ د حکومت له لاسه ایستي او نیولې یې دي.

خو د افغانستان د حکومت د اداري اصلاحاتو د کمیشن مشر نادر نادري بیا د طالب ډلې په لاس د افغانستان د ۱۱۶ ولسوالیو د سقوط خبر تایید کړی دی.