چین یوځل بیا افغان حکومت سره د هر اړخیزې مرستې ډاډ ورکړ
د شي جين پېنګ په خبره چین د ترهګرۍ ضد مبارزه کې د افغانانو ملاتړی دی او له افغانستان سره د اړیکو د پراختیا او پیاوړتیا لپاره هڅه کوي.
چین یو ځل بیا په افغانستان کې د سولې له روانې پروسې او ترهګرۍ ضد مبارزې ملاتړ کړی دی.
ارګ په یوه خبرپاڼه کې ویلي، چې ولسمشر غني د چين له ولسمشر شي جین پنګ سره په تلیفوني خبرو کې په دوه اړخیزو اړیکو خبرې کړې دي.
چین په دې اړیکه کې ویلي، چې هېواد یې په ټوله معنی د افغانستان تر څنګ ولاړ دی او د دغه هېواد په سوله او امنیت کې به خپلو مرستو ته دوام ورکړي.
د شي جين پېنګ په خبره چین د ترهګرۍ ضد مبارزه کې د افغانانو ملاتړی دی او له افغانستان سره د اړیکو د پراختیا او پیاوړتیا لپاره هڅه کوي.
هغه همدا راز له ولسمشر غني سره ژمنه وکړه، چې د کورونا یو ملیون دوزه نور واکسین به هم افغانستان ته لېږي.
د ارګ خبرپاڼه وایي، چې ولسمشر غني هم په دې تلیفوني خبروکې د سولې له پروسې سره د چین مرسته اړینه بللې ده او هغه یې د افغانستان ښه ګاونډی هېواد بللی دی.
دا خبرې داسې مهال کېږي، چې ولسمشرغني تېره شپه ناوخته ازبکستان ته له دوه ورځني سفره کابل ته را ورسېد.
