د هوایي حریم د اشغال په اړه امریکا ته خبرداری
د طالبانو حکومت امریکا ته د افغانستان د هوایي حریم د نقضولو په هکله خبرداری ورکړی او د نړیوالو قوانینو په درناوی ټینګار کړی دی.
د طالبانو د حکومت د ویاند او د فرهنګ وزارت د معین ذبیح الله مجاهد په ټوویټر کې په دې اړه یوه بیانیه خپره شوې ده.
په بیانیه کې راغلې چې د امریکا له لوري د افغانستان د هوایي حریم اشغال د دوحې د هوکړې خلاف عمل دی.
په دې اعلامیه کې له امریکا په جدي ډول غوښتنه شوې چې د دغه کار مخه ونیسي او پر خپلو کړو ژمنو عمل وکړي.
د طالبانو حکومت خبرداری ورکوي، که د دې کار مخه ونه نیول شي، د ټولو ناوړه پایلو مسولیت به بیا د واشنګټن پر غاړه وي.
دا په داسې حال کې ده چې پرون امریکایي قومندان جنرال فرانک مکنیزي له خپل روسي سیال سره په کتنه کې په افغانستان کې د عملیاتو ترسره کولو لپاره په روسیه کې نظامي اډې د ورکړي غوښتنه کړې ده.
تر دې وړاندې د امریکا دفاع وزارت ویاند هم ویلي چې په افغانستان کې د عملیات ترسره کولو لپاره به پنټاګون له طالبانو څخه اجازه وانخلي.
