طالبانو په اول ځل یو هزاره توکمه افغان پر لوړې څوکۍ وګماره
زیاتره نظر خاوندان دې ټاکنې ته په ښه نظر ګوري او په بېلابېلو برخو کښې د نورو متخصصو کادرونو د ګمارنې هیله کوي
له جلال آباده زمونږ خبریال رپورټ راکړی چې د طالبانو مشر ویاند او د اطلاعاتو او کلتور وزارت د خپرونو معین ذبیح الله مجاهد وایي، د طالبانو د مشر ملا هیبت الله د فرمان له مخې ډاکتر عبدالطیف نظری د اقتصاد وزارت د مسلکي معین په توګه ټاکل شوی دی.
مجاهد ویلي چې ښاغلی نظری لوړې زده کړې لري او په اقتصادي چارو کې د پراخې تجربې خاوند دی.
عبداللطیف نظري داسی مهال پر دې دنده ګومارل کیږي چې پر طالبانو د ټولشموله حکومت د جوړولو فشارونه ورځ تر بلې مخ پر ډیریدو دي. ډاکتر عبدالطیف نظری چې خپلې لوړې زده کړې یې په تهران کې پاې ته رسولي په افغانستان کې یې د پوهنتون پر استاذۍ سربیره د راهِ فردا په نوم د یوخصوصي تلویزیون د رییس . او یو څیړنیز مرکز د مشر يه توګه یې هم دندې ترسره کړي . ښاغلی عبدالطیف پر دې سربیره د پخوانۍ ولسي جرګې د اوولسمې دورې د ټاکنو لپاره هم ځان له کابله نومولی او دغه راز د ولسمشرۍ په تیرو ټاکنو کې چې په پایله کې یې اشرف غني ولسمشر شو د نظار شورا د پخواني مشر احمد شاه مسعود د ورور احمد ولي مسعود د وفاق ملي د ټاکنیز ټکټ دویم مرستیال هم نومول شوی و.
زیاتره نظر خاوندان دې ټاکنې ته په ښه نظر ګوري او په بېلابېلو برخو کښې د نورو متخصصو کادرونو د ګمارنې هیله کوي
