افغانستان د نړیوالو دباؤنو ته نه ټیټیږي
د طالبانو د بهرنیو چارو سرپرست وزیر په کابل کې د افغانستان لپاره د ناروې شارژدافیر پال کلومان بکر سره لیدلي.
په دې لیدنه کې د بشري مرستو، امنیت، انکشافي همکاریو او يو لړ سياسي موضوعاتو په اړه خبرې شوې دي.
د افغانستان د بهرنیو چارو وزارت ویلي چې په دې لیدنه کې د ناروې شارژدافیر په افغانستان کي د تېر په پرتله د ښه امنیت تاييد وکړ او وې ویل چې اوس بشري مرستې تر لرې پرتو سیمو په ښه ډول رسيږي.
نوموړي دغه راز ویلي چې هېواد یې له افغانستان سره د تعامل په پار نوي ډیپلوماټان معرفي کړي دي چې د اړیکو په ساتلو کې به مثبت رول ترسره کړي.
د طالبانو د بهرنیو چارو سرپرست وزیر امیرخان متقي هم په دغې کتنې کښې ویلي چې په افغانستان کې له لسیزو وروسته سرتاسري امنیت تامین شوی، د پخوا په ډول اوس افغانان د چاپو او بمباریو له امله نه وژل کیږي او نه هم بېځایه کیږي.
نوموړي ویلي تاریخ ښودلې چې، په افغانستان د فشارنو کارول ګټه نه لري او اوس باید یو له بل سره د همکاریو له لارې پر مخ ولاړ شو. په پای کې دواړو لورو په تعامل او همکاریو ټینګار کړی دی.
