په روسیه کې د افغانستان د سفارت د کارکوونکو شمېر زیات شوی
روسي چارواکو په روسیه کې د افغانستان د سفارت د کارکوونکو د شمېر د زیاتولو اجازه ورکړې ده.
د روسیې د ولسمشر ځانګړي استازي په تاشکند کې د افغانستان د ګاونډیو هېوادونو د ځانګړي استازي د غونډې په څنډه کې په روسیه کې د افغانستان د سفارت د کارکوونکو د شمېر د زیاتوالي په اړه اعلان وکړ.
افغان غږ خبری آژانس د افغانستان په چارو کې د روسیې د ولسمشر ځانګړی استازی ضمیر کابلوف له قوله وايي، روسي چارواکو په روسیه کې د افغانستان د سفارت د کارکوونکو د شمېر د زیاتولو اجازه ورکړې ده.
د افغانستان د ګاونډیو هېوادونو د خاصو استازو لومړۍ غونډه د سه شنبې په ورځ په تاشکند کې جوړه شوه. په دې غونډه کې د ازبکستان، ایران، چین، پاکستان، روسیې، تاجکستان او ترکمنستان استازو حضور درلود.
کابلوف د غونډې په څنډه کې وويل مونږه د سفارت د کارکوونکو د زياتولو اجازه ورکړه، پخوا يو کس و، اوس درې تنه دي.
ده همداراز زیاته کړه: روسیه افغانستان ته دتیلو د صادراتو په اړه تړونونه عملي کوي او د دغو صادراتو د زیاتوالي امکان د کابل په غوښتنه پورې اړه لري
