يونسکو په باميانو ولایت کې ولاړې پروژې بېرته پيل کړي دي

یو شمېر رسنیو خبر ورکړی چې، یونسکو په بامیانو کې د څو میلیونو ډالرو په ارزښت درېدلې پروژې بېرته پیل کړي دي.

د سپوږمۍ راډیو د خبر له مخې، دا پروژې چې پیسې یې ایټالیا ورکوي په دوه زره یو ویشتم کال کې وروسته تر دې ودرېدې چې  جمهوریت سقوط وکړ.

د دې پروژو اصلي تمرکز د بامیانو پر بودا مجسمو او د بامیانو پر غلغلې ښار دی چې د شپږم او لسم میلادي کلونو ترمنځ ودان شوي دي.

یونسکو اټکل کوي چې د دې پروژې له لارې به لږ تر لږه د سیمې سل تنو ته د کار زمینه برابره شي.