د افغانستان ډیرو انجلیو په کم عمر کښې وادونه کړي
شفقنا خبري اژانس راپور راکړی د طالبانو د حکومت د احصائیې ادارې وویل د هیواد کابو څلویښت فیصده انجلیو له اتلسو کلونو په کم عمر کښې وادونه کړي دي.
د طالبانو د حکومت د معلوماتو او د احصائیې د ملي ادارې مشر فقیر محمد زیار پرون وویل دغه تحقیق او د شمیر معلومولو درې میلیونه ډالره لګښت لرلی او هغه د افغانستان په څلوردیرشو ولایتونو کښې د یوسل شپږدیرشو ښځو په شمول د څلور سوه دوه شپییتو سړیو په ملګرتیا سره ترسره شوی دی.
سره له دې معلومه نه ده چې طالبانو له اتلس کلونو د کم عمر د وادونو په هکله اطلاعاتو ته د لاسرسي لپاره له کومو اوزارونو استفاده کړي ده.
کارپيژاندي وايي چې په افغانستان کښې په معیاري ډول سرشمیرنې سخت کار دی ځکه چې تراوسه په دقیق ډول د هیواد سرشمیرنه نه ده ترسره شوي.
راپورونه وايي په افغانستان کښې په خلکو کښې د بې وزلۍ د زیاتیدا په علت په کم عمر کښې د ماشومانو په زوره وادول زیات شوي دي.
له بلې خوا د بشري حقوقو ارګانونو په ځلونو اندیښنه څرګنده کړي ده چې د طالبانو لخوا له زده کړې د انجلیو محرومول هغوې په کم عمر کښې د واده کیدا له خطر سره مخامخ کړي دي.
تیر کال د ملګروملتونو د ماشومانو د ملاتړ د صندوق مشر ویلیم کورنلیوس په افغانستان کښې په کورنیو باندې اقتصادي دباو ته په اشارې سره ویلي وو د هغو انجلیو عمر چې د وادونو لپاره خرڅول کیږي په پرله پسې ډول د کمیدا په حال کښې دی او همدا اوس د افغانستان ځینې خلک خپلې لوڼې چې عمرونه یې له پینځو کلونو کم دي په پیسو خرڅوي.
