لوګر کې ناپېژنده کسانو یو ښوونکی وژلی

د لوګر د امنیې قومندانۍ چارواکي وايي چې تېره شپه د محمداغې ولسوالۍ په «برګ» کلي کې ناپېژنده کسانو یو ښوونکی په ډزو وژلی دی.

د سلام‌وطندار راډیو د خبر له مخې، د یاد ولایت د امنیې قومندانۍ ویاند احمدالله انس د یاد خبر د تایید ترڅنګ ویلي، دغه ښوونکي د خوښۍ ولسوالۍ په مڼۍ ښوونځي کې دنده لرله.

انس زیاته کړه چې یاد ښوونکی هغه مهال د ناپيژنده کسانو له لوري وژل شوی کله چې د شپې پرمهال پر خپله کرونده کې د اوبو پر لګولو بوخت وو.

د نوموړي په وینا، تراوسه د وژل شوي ښوونکي په تړاو څوک نه‌دي نیول شوي، خو امنیتي ځواکونو خپلې پلټنې پيل کړي دي.

باید وویل شي چې تېره اونۍ هم د لوګر په مرکز پل‌علم او په څرخ ولسوالۍ کې په دوو جلا پېښو کې دوه کسان د ناپېژنده کسانو له لوري په ډزو وژل شوي وو.