پاکستان د افغان سوداګرو ۵۵۰۰ کانټینران نیولي دي

د پاکستان حکومت په ناحقه د افغان سوداګرو په زرګونه کانټینران حصار کړي دي او په لسګونه میلیون ډالره یې افغان سوداګرو ته زیان اړولی دی.

د افغانستان په جنوبي ولایت کندهار کې یو شمېر سوداګر وايي، د افغان سوداګرو زرګونه په توکو بار کانټینرونه، له تېرې یوې نیمې میاشتې راهیسې پاکستان کې په ناقانونه ډول ګرځول شوي او هره ورځ ورباندې سلګونه زره ډالر مالیه راځي.

د کندهار سوداګرۍ خونې د چارواکو په وینا، دا موضوع د پاکستان له حکومت سره څو ځلې شریکه شوې، خو هغوی یې په تړاو څه نه دي کړي.

 د کندهار د سوداګرۍ خونې مرستیال انجنیر عبدالباقي بینا مسیر ورځپاڼې ته وویل: چې له پنځو تر پنځه نیمو زرو پورې کانټینرونه د پاکستان بندري ښار کراچۍ په ګمرکونو کې حصار پاتې دي.