طالبانو په بدخشان کې د تحریر ګوند ۴۵ غړي نیولي
د بدخشان ځايي سرچينې وايي، د تېرې یوې اونۍ په اوږدو کې د طالبانو استخباراتو ادارې د تحرير ګوند ۴۵ غړي نيولي، چې ټول يې ځوانان او د بدخشان پوهنتون محصلين دي.
د هشت صبح ورځپاڼې د خبر له مخې؛ په دغه ولایت کې د تحریر ګوند غړي له داعش ډلې سره د اړیکو په تور نیول شوي او لا هم د دوی د نیولو لړۍ روانه ده.
د سرچينې د معلوماتو له مخې، دوه اونۍ وړاندې د طالبانو استخباراتو په دغه ولايت کې تحریر ګوند د غړو په ګډون، د داعش ١٦ کسيزه ډله نيولې وه، چې ډېرى يې د بدخشان پوهنتون د شرعياتو پوهنځي محصلين دي.
سرچینې لا هم ادعا کوي چې تحریر ګوند د هېواد په شمال په ځانګړي ډول بدخشان او تخار کې فعال حضور لري او د طالبانو له واکمنۍ وروسته د دوی فعالیتونه پټ دي.
د بدخشان طالب سیمه ایزو چارواکو تر اوسه په دې اړه څه نه دي ویلي.
تېر کال د طالبانو استخباراتو د دغه ګوند پر فعالیتونو بندیز لګولی دی.
سربېره پر دې چې د حزبالتحریر فعالیت د افغانستان په پخواني حکومت کې هم جنجالي وو، خو دغه ګوند په ۱۹۵۳ کال کې د یوه فلسطیني عالم تقيالدین نبهاني له خوا رامنځته شو.
شیخ عطاء بن خلیل ابورشته له ۲۰۰۳ کال راهیسې د دغه ګوند مشر دی.
التحریر ګوند ادعا کوي چې په ۵۰-۶۰ هېوادونو کې فعالیت لري، خو په ډېرو هېوادونو کې یې فعالان غیر قانوني ګڼل کېږي.
