په ترکیه کې ۹۹ افغان کډوال نیول شوي دي

د ترکیې پولیسو د رزانجان ښار د ترجان په لویه لار په یوې لارۍ کې سپاره ۹۹ افغان کډوال نیولي دي.

د ترکي رسنیو د خبر له مخې، په یادو کسانو کې درې کسان د انساني قاچاق پر تور نیول شوي دي.

په خبر کې راغلي: دغو کسانو د ترکیې د اوسېدو رسمي اسناد نه درلودل او پولیسو له قانوني چلند وروسته، د اړوند ښار د کډوالو رياست ته سپارلي دي.

دا په داسې حال کې ده، چې په دې وروستیو کې ترکي چارواکو، په ترکیه کې د کډوالو د نيولو او شړلو لپاره عمليات جاري  ساتلي دي.