په کندهار کې د ملي ټلویزیون پر نشراتو بندیز لګېدلی دی
سرچینې وايي چې په کندهار ولایت کې د یوازینۍ انځوریزې دولتي رسنۍ «کندهار ملي ټلویزیون» چې اوس مهال يې د طالبانو تر مدیریت لاندې کار کاوه، پر نشراتو بندیز لګېدلی او کار کوونکي یې وزګار شوي دي.
په کندهار کې ځایي سرچینو ویلي چې په دې ولایت کې د کندهار د ملي راډیو ټلویزیون انځوریزې برخي نشرات د زمري میاشتي پر ۲۳ مې نېټې بند شوي او د وږي میاشتې پر ۱۲ مه يې کارکوونکي هم رخصت کړي دي.
سرچینې وایې، د کندهار ملي ټلویزیون د نشراتو تر بندیدو وروسته څو تنه کارکوونکي کابل کې د دې رسنۍ مرکزي څانګې ته د کار کولو په موخه ورمعرفي شوي.
د سرچینو په وینا، کندهار ولایت کې د ملي ټلویزیون د محلي څانګې انځوريزي برخې نشرات په دې ولایت کې د ویډیويي راپورونو تر نشرولو وروسته بند شوي.
کندهار کې ملي ټلویزیون یوازینۍ انځوریزه رسنۍ وه چې د طالبانو تر واکمنېدو وروسته یې په کندهار ولایت کې فعالیت درلود.
په دې رسنۍ کې شاخوا ۳۰ تنو کارکوونکو په بېلابېلو برخو کې دنده لرله.
تردې مخکي د کندهار ولایت لپاره د طالبانو اوسني والي ملا شیرین اخوند د انسانانو او روح لرونکو شیانو پر تصویر اخیستلو بندیز لګولی و.
