افغانستان په لومړي ځل په کریکټ کې سویلي افریقا ته ماتې ورکړه
د افغانستان د کرکټ ملي لوبډلې د درې یو ورځنیو سیالیو د لوبلړۍ په لومړۍ لوبه کې سویلي افریقا ته د ۶ وېکټو په توپیر سره ماتې ورکړه.
دغه سیالي چې پرون چهارشنبه د سپټمبر میاشتې په ۱۸مه نېټه د متحده عربي اماراتو په شارجه لوبغالي کې پیل شوه، سویلي افریقا د پچې تر ګټلو وروسته توپوهنه غوره کړه.
مېلمه لوبډلې د ټولو لوبغاړو تر سوځېدو وروسته په ۳۳.۳ اورونو کې ۱۰۶ منډې جوړې کړې.
د یادې لوبډلې په ګټه وین مولډر تر نورو زیاتې ۵۲ منډې وکړې.
په افغان توپ اچوونکو کې فضلحق فاروقي ۴، الله محمدغضنفر ۳ او راشدخان دوه لوبغاړي وسوځول.
افغان لوبډلې ورکړای شو هدف د ۴ ویکټو تر سوځېدو ورسته په ۲۶م اور کې پوره کړ.
په افغان توپ وهونکو کې ګلبدین نایب ۳۴ او عظمت الله عمرزي ۲۵ ناسوځېدلې منډې وکړې.
فضلحق فاروقي د دې لوبې د غوره لوبغاړي جایزه وګټله.
ټاکل شوې ده چې، دواړه لوبډلې به دویمه سیالي د روانې سپټمبر میاشتې په ۲۰مه او وروستۍ به د همدې میاشتې په ۲۲مه نېټه ولوبوي.
