ننګرهارکې سیلابونو خلکو ته د سر او مال درانه زیانونه وارړولي دي
د ننګرهار اطلاعاتوا و کلتور ریاست په هغه خبرپاڼه کې چې رسنیو ته استولې د دې ولایت د طبیعي پیښو پر وړاندې چمتووالي ادارې د چارواکوله قوله لیکلي چې د تیرې شپې اورښت او راوتلو سیلابونو د دې ولایت په لعلپورې، شینوارو، مومندرې، بټي کوټ، ګوشتې او ښیوې ولسوالیو کې خلکو ته د سر او مال درانه زیانونه وراړولي دي.
په خبر پاڼه کې د څلور کوچنیانو پر مرګ ژوبلې سربیره د نږدې درې سوه استوګنځیو د زیانمنیدو، تر پنځه زره جریبه زیاتې کرنیزې ځمکې او فصلونو، ګڼ شمیر ټولګټو تاسیساتو د ویجاړیدو او دغه راز د سلګونو څارویو د له منځه تللو پخلی شوی دی.
په خبرپاڼه کې راغلي چې دا معلومات او شمیرې وروستۍ نه دي او ښایي بدلون پکې رامنځته شي.
داطلاعاتو او کلتور ریاست په خبرپاڼه کې د ولایتي ادارې له لورې د سیلاب ځپلو سره د مرستې ترسره کولو په اړه څه نه دي ویل شوي خو له مرستندویه ادارو او خیریه بنسټونو غوښتل شوي چې د سیلاب ځپلو کورنیو لاسنیوی وکړي.
خبرپانې له خلکو غوښتې چې د سیلابونو د احتمالي خطرونو نه د ساتنې په موخه خوندي سیمو ته ولاړ شي.
د افغانستان د هوا پیژندنې ادارې د معلوماتو له مخې په راتلونکو ورځو کې هم په ختیزو ولایتونو له هغې ډلې ننګرهارکې د نورو اورښتونو او سیلابونو راوتلو شونتیا موجوده ده.
