د یوناما مشرې له افغانانو سره پر بشري مرستو ټینګار کړی

د کډوالو او راستنېدونکو چارو وزیر مولوي عبدالکبیر د یوناما له مشرې روزا اوتنبایوا سره د مخې ښې لیدنه وکړه.

په دې کتنه کې روزا اوتنبایوا په وروستۍ زلزله کې د زیانمنو شویو په اړه خپله خواشیني څرګنده کړې او ویلي چې ملګري ملتونه له اړمنو افغانانو سره خپلو مرستو ته دوام ورکوي.

د یوناما مشرې له افغانانو سره پر بشري مرستو ټېنګار کړی او زیاته کړې یې ده، چې د ملګرو ملتونو ۲۵ ډلې زلزله ځپلو سیمو ته رسیدلې او د حالت له ارزولو وروسته به مرستې پیل شي.

هغې د خپلو خبرو په پای کې ویلي، چې ملګري ملتونه د کډوالۍ دایمي حل په موخه د افغانستان په شمال کې له کډوالو وزارت سره په همغږۍ د ۲۳ میلیونو ډالرو په ارزښت پروژه پلې کوي او دویم پړاو به یې په نیمروز او فراه ولایتونو کې تطبیق شي.