تورخم لاره د مسافرو د تګ راتګ په مخ بنده شوې

په افغانستان کې د ننګرهار ولایت د طالبانو د حکومت د اطلاعاتو او کلتور ریاست اعلان کړی چې د تورخم دروازه د "نامعلومو دلایلو" له امله د مسافرو پر مخ تړل شوې ده. د وروستي ځل لپاره دغه لار د روان لمریز کال په پسرلي کې تړل شوې وه چې شاوخوا یوه میاشت یې دوام وکړ.

په ننګرهار کې د اطلاعاتو او کلتور ریاست د نشراتو مسؤل قریشي بدلون پر خپله ایکس پاڼه دا خبر خپور کړی او له ټولو هغو مسافرو چې پر دې لارې تګ راتګ کوي ، غوښتي چې تر بلې خبرتیا پورې دي له دي لارې پاکستان ته له سفره ډډه وکړي.

که څه هم معلومه نه ده چې د لارې د بندېدو اصلي لامل څه دی، خو د ننګرهار د سوداګرۍ او پانګونې خونې د مدیره پلاوي غړی ډاکټر مخلص احمد وايي چې د هغو معلوماتو پر بنسټ چې دوی ته رسېدلي، د تورخم لارې د تړلو اصلي لامل د پولې ها غاړې ته د پاکستان د کډوالو په دفتر کې د انټرنټ سیسټم کې تخنیکي ستونزې دي.