عبدالسلام حنفي: افغانستان ازاد او بېطرفه هېواد دی
د طالبانو د ریاستالوزرا اداري مرستیال عبدالسلام حنفي وايي، افغانستان نه د ختیځ او نه هم د لوېدیځ پلوي دی، بلکې ازاد او بېطرفه هېواد دی.
حنفي دغه څرګندونې د کابل–بګرام سړک د عملي چارو د پیل په مراسمو کې وکړې او ویې ویل، افغانستان د هېڅ لوري پر وړاندې مبارزه نه کوي او غواړي له ټولو هېوادونو سره متوازن اړیکې ولري.
هغه زیاته کړه: «موږ نه د لوېدیځ ترڅنګ ولاړ یو چې د ختیځ پر وړاندې مبارزه وکړو او نه د ختیځ ترڅنګ ولاړ یو چې د لوېدیځ پر وړاندې مبارزه وکړو. افغانستان یو ازاد او بېطرفه هېواد دی.»
نوموړي د نړۍ هېوادونو ته په افغانستان کې د پانګونې بلنه هم ورکړه او ټینګار یې وکړ چې افغانستان به د هېڅ هېواد په کورنیو چارو کې لاسوهنه ونه کړي او له ټولو سره اقتصادمحوره او مثبت تعامل غواړي.
دا څرګندونې داسې مهال کېږي چې طالبان له پاکستان سره د ټيټيپي د موضوع پر سر اختلافات لري، خو له نورو هېوادونو سره د اړیکو پراخولو هڅې کوي.
