نورستان کې تېرکال شاوخوا ۳۰۰ رغنیزې پروژې پلې شوي دي
چارواکي وایي، دا پروژې د حکومت او مرستندویه ادارو په مالي لګښت بشپړې شوي دي.
د نورستان د والي ویاند فریدون صمیم وایي، په تېر۱۴۰۴ لمریز کال کې په دې ولایت نږدې ۳۰۰ رغنیزې او پراختیایي پروژې پلې شوي، چې پرې د حکومت له بودجې کابو یو نیم میلیارد افغانۍ او د مرستندویه ادارو له لورې ۳۶میلیونه ډالر لګول شوي دي.
د نورستان د والي ویاند وویل ، دا پروژې، چې د روغتیا، کلیو او پراختیا او بیارغونې، معارف او نورو سکټورونو کې دي د نورستان په مرکز پارون او بېلابېلو ولسوالیو کې پلې شويدي.
نورستانیان د دې پروژو د پلې کېدو له امله خوشحاله دي، خو له حکومت او مرستندویه ادارو غواړي، چې په نوي کال کې دې لرې پراته ولایت ته ځانګړې پاملرنه وکړي.
په نورستان ولایت کې د تېر کال د پلې شویو پروژو له ډلې یوه هم دغه ولایت ته د غزېدلي واټ بیارغونه ده ،چې چارې یې تېر کال پیل او په چټکۍ سره روانې دي.
ځایي چارواکي او د نورستان ولایت اوسېدونکي وایي، د دې سړک په جوړیدو سره به نه یوازې دا چې د نورستانیانو ستونزې هوارې شي بلکې نورستان ته به د کورنیو او بهرنیو سیلانیانو په ورتګ کې هم پام وړ اسانتیاوې رامنځته شي.
