عبدالله سرحدي: د بودا مجسمه مې په خپلو لاسونو ویجاړه کړه
په بامیان او جوزجان کې د طالبانو پخواني والي عبدالله سرحدي په یوه مستند کې ویلي چې د بودا مجسمه یې په خپلو لاسونو ویجاړه کړې ده.
نوموړي په پیل کې هڅه کوله چې د دغو لرغونو اثارو په اړه څه ونه وايي خو وروسته یې وویل: «ما هغه په خپلو لاسونو ویجاړه کړه.»
سرحدي ویلي: «موږ چې هر څه کړي او کوو یې، د الله د قانون له لارښوونې سره سم دي… موږ بتان پلورو نه، ماتوو یې. ولې پښېمانه شم؟ دا د خدای اراده وه.»
د بودا مجسمې د طالبانو په لومړۍ واکمنۍ کې ویجاړې شوې او پراخ نړیوال غبرګون یې راوپاراوه.
نوموړی د ۱۹۹۰مو کلونو پر مهال، د طالبانو د لومړۍ واکمنۍ په وخت کې پوځي قوماندان و.
هغه څو کاله په ګوانتنامو زندان کې بندي و او وروسته ازاد شو.
د راپور له مخې، واک ته د طالبانو له رسېدو وروسته سرحدي په بامیان او وروسته جوزجان کې والي شو او اوس تازه په کندوز کې د یوې پوځي قول اردو مرستیال قوماندان ټاکل شوی دی
