کرزي په کونړ او هلمند د پاکستان هوايي بریدونه وغندل
د افغان رسندویو له راپور سره سم پخواني افغان ولسمشر حامد کرزي په کونړ او هلمند ولایتونو کې پر استوګنیزو سیمو د پاکستان هوايي بریدونه «د افغانستان پر حریم تېری او د حاکمیت نقض» بللي او په کلکه یې غندلي دي.
کرزي د پاکستان له چارواکو غوښتي چې د «پلمو جوړولو او د افغان ښځو او ماشومانو د وژلو» پر ځای دې خپلې د ضدیت پالیسۍ او دښمنانه طرحې له سره وڅېړي او د افراطپالنې له خپرولو او نفاقاچولو دې لاس واخلي..
پخواني ولسمشر همدا راز له پاکستانه غوښتي چې له افغانستان سره د ښه ګاونډیتوب او متمدنانه اړیکو پر بنسټ تعامل وکړي.
په هلمند او کونړ د پاکستان د هوايي بریدونو له امله ۹ ملکیان وژل شوي او ۱۱ تنه نور ټپیان شوي دي.
له بلې خوا بیا د پاکستان د اطلاعاتو وزارت ویلی دي چي افغانستان لا هم د ترهه ګرۍ مرکز پاتې دی، پاکستان ته د ترورېزم ګواښ له افغانستان څخه پیدا کیږي، او تر هغه چې ترهه ګرۍ په بشپړه توګه له منځه نه وي تللی، عملیات به دوام وکړي .
