ملا برادر اخوند د افغان حکومت په مشوره پاکستان ته سفر کړی
د افغانستان د بهرنیو چارو وزارت وايي، اسلام اباد ته د طالبانو د سیاسي دفتر د مشر ملابرادر اخوند او ورسره مل پلاوي سفر له افغان حکومت سره په مشوره شوی دی.
د افغانستان د بهرنیو چارو وزارت نن د یوې خبرپاڼې په خپرولو سره ویلي، دغه سفر د پاکستاني چارواکو په رسمي بلنه او افغانستان ته د پاکستان د وزیراعظم عمران خان د سفر په پایله کې د افغان حکومت سره تر سلا مشورو وروسته تر سره شوی او هیله لري چې د سولې پروسې سره به مرسته وکړي.
خبرپاڼه زیاتوي، دا سفر په افغانستان کې د ملي روغې جوړې او د سولې بهیر د پیاوړتیا د هڅو په درشل کې شوی، چې افغان حکومت یې ستاینه کوي او هیله لري چې هدف ته د رسېدو په برخه کې عملي ګامونه واخیستل شي.
د بهرنیو چارو وزارت وايي، افغان دولت د افغان ملت برحقه غوښتنې چې ژر تر ژره د تاوتریخوالي کمېدل، اوربند او د خبرو له لارې تلپاتې سولې ته رسېدل دي له پاکستاني چارواکو سره شریکې کړي دي.
خو د طالبانو سیاسي دفتر تر اوسه په دې هکله کوم څه نه دي ویلي.
په قطر کې د طالبانو د سیاسي دفتر ویاند محمد نعیم وردک تیر ماخوستن پر خپل ټوټېر اسلام اباد ته د طالب پلاوي د سفر جزیات شریک کړل.
