په مسکو کې د افغان سولې په تړاو غونډه پیل شوه
په مسکو کې د افغان سولې لپاره ځانګړې غونډه د روسیې هېواد د بهرنیو چارو وزیر سرګي لاوروف په مشرۍ پرانیستل شوه.
د روسیې د بهرنیو چارو وزیر سرګي لاوروف د غونډې د ویناوالو له ډلې او له طالبانو غوښتي چې د دوحې هوکړې ته ژمن پاته شي.
د غونډې له جریانه لا ډېر جزئیات نهدي خپاره شوي، خو اټکل دا دی چې د ورځې په پای کې د شویو بحثونو په اړه یوه اعلامیه خپره شي.
غونډه کې د افغان دولت په استازيتوب د افغانستان د مصالحې د شورا مشر عبدالله او د طالبانو لوړپوړو پلاویو د طالبانو د سیاسي دفتر مشر ملاعبدالغني برادر په ګډون برخه اخیستې او پر دې سربېره د افغانستان د سولې لپاره د امریکا ځانګړی استازی زلمی خلیلزاد هم ورغلی دی.
د یادونې وړ ده چې په دې غونډه کې د افغان حکومت او طالب استازو په ګډون د امریکا، چین، روسیې او پاکستان استازي برخه لري.
د مسکو غونډه اوس د تړلو دروازو تر شاه روانه ده، یوازې د روسیې دریو رسنیو ته اجازه ورکړل شوې ده.
