په تهران کښې د بېن الافغاني خبرو اترو غونډه شروع شوه
د ايران د اسلامي جمهوريت په کورباتوب د بين الافغاني خبرو اترو غونډه نن په تهران کښې شروع شوه.
د ايران پرېس د رپوټ له مخې د افغان حکومت د استازيو، د جمهوريت لوړ رتبه شخصيتونو او د طالبانو د لوړ رتبه سياسي پلاوي په ګډون سره د بين الافغاني خبرو اترو غونډه نن د ايران د اسلامي جمهوريت په کورباتوب او د ايران د خارجه وزير محمد جواد ظريف په وېنا سره په تهران کښې شروع شوه.
محمد جواد ظريف د دغې غونډې د پرانېستې په موقع په خپله وېنا کښې په افغانستان کښې د امريکې فوځي مداخلت او په دغه هېواد کښې له دوو لسيزو نه د زياتې مودې شتون ته په اشارې سره چې د ډېرو خرابيو او ويجاړيو سبب شوے دے وويل: نن پکار دے د افغانستان سياسي مشران د خپل هېواد مستقبل لپاره ګرانې فېصلې وکړي.
د ايران خارجه وزير په افغانستان کښې د لانجو او جګړو د دوام ناخوښه نتائجو ته په اشارې سره د بين الافغاني خبرو اترو مېز ته ستنېدل او د سياسي لارو چارو ژمنه د افغانستان د مشرانو او سياسي ډلو لخوا ترټولو غوره انتخاب وبلۀ او په افغانستان کښې د لانجو او بحرانونو د هواري لپاره د موجودو ډلو ترمېنځ د خبرو اترو له بهير سره د مرستې لپاره د ايران د چمتوالي اعلان وکړ
ظريف همدارنګ د صلحې له ټينګښت نه پس د افغانستان له هر اړخيزې سياسي، اقتصادي او اجتماعي ودې او پراختيا سره د مرستې لپاره د ايران د اسلامي جمهوريت په ژمنه تاکيد وکړ.
د خبرو اترو په دې پړاو کښې د افغانستان د حکومتي پلاوي مشري د دغه هېواد د مخکيني خارجه وزير يونس قانوني او د طالب ډلې د پلاوي د خبرو اترو د ټيم مشري د دغې ډلې د دفتر مرستيال عباس ستانکزے په غاړه لري.
