د ایران د پارلمان مشر:
هیڅ یو اقدام د اسرائیل د رژیم اعتبار نه شي ستنولای
د ایران د پارلمان مشر وویل: هغه ماته چي صهیونیست رژیم د اکټوبر په اووهمې نیټې له حماس څخه خوړلې ده په هیڅ ډول اقدام سره نه شي جبرانېدای.
د ایران د اسلامي جمهوریت د پارلمان مشر محمد باقر قالیباف نن د جرګې په عمومي غونډه کې جوته کړه: په تېرو ورځو کې اسرائیل رژیم د امریکا په بشپړه ملاتړ سره په غزې کې په عامو خلګو او همدارنګه د روغتونونو او ښوونځیو په شمول په ټولو عامو تاسیساتو باندې بریدونو ته دوام ورکړی دی.
هغه زیاته کړه: اسرائیل رژیم په غزې کې د عامو خلګو وژنې ته د امریکا په فوځي، ډیپلماټیک او رسندویې ملاتړ سره دوام ورکوي.
قالیباف ټینګار وکړ: نن سبا د نړۍ عامه افکار له پخوا نه زیات له صهیونیست رژیم څخه کرکه کوي او د هغوی دروغجن برم د هغوی د ملګرو په نزد هم له مینځه تللی دی.
د ایران د پارلمان مشر یادونه وکړه چي مسلمانان او د نړۍ ازادي غواړي ولسونه له خپلو حکومتونو څخه تمه لري چي د امنیت شورا په څېر نړیوالو ارګانونو ته اجازه ور نه کړي چي د امریکا په زور وینو سره، د صهیونیست رژیم په جنایاتو سترګې پټې کړي.