د ایران او پاکستان ترمنځ د سوداګرۍ نوې پاڼه پرانیستل شوه
پارس ټوډی - په تهران کې د پاکستان سفير د ایران سره د سوداګرۍ د پراختيا لپاره د نوي اجرايي لارښوونې د صادرولو اعلان وکړ؛ دا اقدام کولای شي د دواړو هېوادونو ترمنځ اقتصادي همکارۍ کې د پام وړ زیاتوالی رامنځته کړي.
په ایران کې د پاکستان سفير «محمد مدثر ټيپو» وويل، اسلام اباد د اوږدو ارزونو او د ایراني او پاکستاني سوداګرو د اندېښنو له کتنې وروسته، د ایران سره د سوداګرۍ د پراختيا لپاره نوې لارښوونه صادر کړې ده.
نوموړي دا اقدام د دواړو ګاونډيو هېوادونو ترمنځ د سوداګريزو اړيکو د کچې او تنوع لوړولو لپاره مهم ګام وباله.
ټيپو له اقتصادي فعالانو، صنعتکارانو او سوداګريزو خونو وغوښتل چې د دې لارښوونې له ګټو څخه ګټه پورته کړي او دا له خپلو غړو سره شريک کړي.
دا نوې اجرايي لارښوونه د پاکستان د ماليې وزارت له خوا د تصويب او د «شهباز شريف» په مشرۍ د کابينې له تائيد وروسته عملي پړاو ته داخل شوې ده.
