طالبان د چابهار له بندره ګټه پورته کولو ته لیواله دي
په تهران کې د طالبانو سفیر د آزاد زون سازمان له اجرایوي مشر سره په لیدنه کې د افغان سوداګرو لپاره د چابهار بندر په کارولو ټینګار وکړ.
په ایران کې د طالبانو سفیر فضل محمد حقاني د چابهار بندر د آزاد زون سازمان له اجرایوي رییس محمد سعید اربابي سره د افغان سوداګرو لپاره د دې بندر د کارولو په انتخابونو بحث وکړ.
په تهران کې د طالبانو سفارت په یوه مطبوعاتي اعلامیه کې وویل چې دواړو خواوو د سوداګرۍ او اقتصادي اړیکو په پراخولو ټینګار وکړ.
د یادونې وړ ده چې مخکې د طالبانو د صنعت او سوداګرۍ وزیر نورالدین عزیزي ایران ته سفر کړی و ترڅو له چابهار بندر څخه د افغانستان توکي هند ته انتقال کړي.
د مطبوعاتي اعلامیې له مخې، په غونډه کې د صادراتو اسانتیا، د سوداګرۍ زیاتولو، د ټرانزیټ پراختیا او د موجوده ننګونو د ختمولو لپاره د چابهار آزاد زون د ظرفیتونو د اغیزناکې کارونې په اړه بحث وشو.
