افغانستان او ایران د کرنیزو همکاریو پر پراختیا ټینګار وکړ
د افغانستان او ایران چارواکو په یوه لیدنه کې د کرنې په برخه کې د همکاریو پر پراختیا، د تجربو او تخنیکي معلوماتو پر تبادله او د موجودو ظرفیتونو پر اغېزمنې کارونې ټینګار وکړ، څو د دواړو هېوادونو اقتصادي او سوداګریزې اړیکې لا پیاوړې شي.
د سرپرست حکومت اړوندو شرکتونو عمومي رئیس احمدجان بلال، د ایران د کرنې له وزیر غلامرضا نوري او په افغانستان کې د ایران د سفارت له سرپرست علیرضا بیکدلي سره لیدلي او د کرنیزو همکاریو د پراختیا او د اړوندو ادارو او بنسټونو ترمنځ یې د لا زیاتې همغږۍ په اړه خبرې کړې دي.
د سرپرست حکومت د شرکتونو ادارې په یوه خبرپاڼه کې ویلي، چې په دې لیدنه کې د کرنې او اقتصاد په بېلابېلو برخو کې د همکاریو او همغږۍ د زیاتولو لارې چارې وڅېړل شوې.
احمدجان بلال په دې برخه کې د کرنیزو تولیداتو د زیاتوالي، د محصولاتو د پروسس او بستهبندۍ د کیفیت د لوړولو، د کرنیزو تجربو او تخنیکي معلوماتو د تبادلې په برخه کې د لا زیاتې همکارۍ او ملاتړ غوښتنه کړې ده.
بلخوا، د ایران د کرنې وزیر غلامرضا نوري له افغانستان سره د کرنې، مالدارۍ، د کرنیزو محصولاتو د پروسس او بازارموندنې په برخو کې د همکاریو د پراختیا لپاره د خپل هېواد چمتووالی څرګند کړی دی.
نوري ویلي، په دغو برخو کې د همکاریو پراختیا کولای شي د افغانستان او ایران ترمنځ د اقتصادي او سوداګریزو اړیکو په پیاوړتیا کې مرسته وکړي.
همدارنګه، په افغانستان کې د ایران د سفارت سرپرست علیرضا بیکدلي، احمدجان بلال ایران ته د سفر بلنه ورکړې ده.
د لیدنې په پای کې دواړو لورو د موجودو ظرفیتونو پر اغېزمنې کارونې او د کرنې او اقتصاد په برخو کې د ګډو همکاریو پر پراختیا ټینګار کړی دی.
افغانستان او ایران په وروستیو کلونو کې د اقتصادي او سوداګریزو همکاریو پر زیاتوالي او د کرنې، ترانزیټ او د کرنیزو محصولاتو د بازارموندنې په برخو کې د اړیکو پر پراختیا ټینګار کړی دی.
د راپور له مخې، یو شمېر کارپوهانو هم د دې لیدنې هرکلی کړی او دا یې د دواړو هېوادونو د اقتصادي او سوداګریزو اړیکو د پیاوړتیا په لور «اغېزمن ګام» بللی دی.
