ایران د پاکستان په بلوچستان کښې شوې ترهګره چاودنه وغندله
د ایران د اسلامي جمهوریت د خارجه وزارت ویاند بیګا د پاکستان په بلوچستان صوبه کښې په یوه انتخاباتي غونډه کښې شوې ترهګره چاودنه وغندله.
د ایران د بهرنیو چارو د وزارت ویاند بهرام قاسمي د یادې ترهګرې چاودنې په غندلو سره د پاکستان له ولس او حکومت په تیره بیا د پيښې د قربانیانو له کورنیو سره خواخوږي څرګنده کړه.
د ویلو ده چې پرون مازیګر د بلوچستان صوبې په مستونګ سیمه کښې د بلوچستان عوامي پارټۍ په انتخاباتي جلسه کښې د یوې زورورې بمي چاودنې له امله د دغه ګوند د مشر نواب زاده سراج رییساني په شمول ۱۳۰ تنه وژل شوي او ۱۵۰ نور زخمي شوي دي.
تیره اونۍ د پاکستان د خیبر پښتونخوا صوبې په مرکز پیښور کښې هم د عوامي نیشتل پارټۍ په غونډه کښې د شوې ترهګرې چاودنې له امله د صوبايي اسمبلۍ لپاره د دغه ګوند کاندید هارون بلور سره د نورو ګڼو کسانو وژل شوی او همداشان لسګونه تنه پلویان یې زخمي شوي وو.
د پاکستان پارلیماني انتخابات د روانې جولایۍ میاشتې په ۲۵ نیټه ترسره کیدونکي دي.
