د سیمې امنیت به له امریکا په پیروۍ سره تامین نشي
زمونږ خبریال وايي د ایران د بهرنیو چارو د وزارت ویاند سید عباس موسوي د لویدیځې اسیا سیمې ځینو عربو هیوادونو ته په وینا کښې ټینګار وکړ د سیمې امنیت به له امریکا په اطاعت سره تامین نشي .
هغه نن د سعودي عربستان او د بحرین په شمول د سیمې د ځینو هیوادونو د چارواکو لاسوهونکو څرګندونو او بې اساسه تورونو ته په ځواب کښې وویل د سعودي عربستان په شان هیوادونه چې کلونه کلونه یې د القاعده او د داعش په شان د ترهګرو ډلو په ملاتړ کولو سره په سیمه کښې بې ثباتۍ ته لمن وهلي ده په ایران بې اساسه تورونه لګوي خو تهران په خپل مسولانه کړچار سره د سیمې د هیوادونو له سر څخه د ترهګرو ډلو شر ختم کړی دی .
د ایران د خارجه وزارت ویاند موسوي زیاته کړه د داسې هیوادونو لخوا چې څه د پاسه پینځه (۵)کاله کیږي د امریکا په وسلو سره د یمن د ښځو او د ماشومانو په شمول په زرګونو کسان په وینو کښې لیت پیت کوي د ایران پرضد د وسله والو بندیزونو د دوام لپاره د واشنګټن له غوښتنې ملاتړ کول داسې تریخ حقیقت دی چې په دغو ورځو کښې یې کتونکي یوو .
هغه په سیمه کښې د امنیت او د ثبات د رامینځته کولو د یوازنۍ لارې په توګه د سیمه ییزې ملګرتیا په دوام ټینګار سره وویل اوس وخت رارسیدلی دی چې دغه عرب هیوادونه له ناپوهه څرګندونو او د امریکا چې په خپله په نړۍ کښې د ظلم او د بې عدالتۍ بیلګه ده په ړندو سترګو پیروۍ څخه لاس واخلي او دغه باور ته ورسیږي چې امنیت به له امریکا څخه په اطاعت سره تامین نشي .
د بحرین خارجه وزیر عبداللطیف بن راشد الزیاني او د ایران په چارو کښې د امریکا ځانګړي استازي برایان هوک بیګا په ګډې بیانیې کښې د ایران پرضد د چټي ادعاګانو په تکرارولو سره د تهران پرضد د وسلو د بایکاټونو د تمدیدولو غوښتنه وکړه .
