پاکستان کښې ترهګرو اته پوځیان او پولیس وژلي دي
زمونږ خبریال وايي وړمه شپه او بیګا د افغانستان له خاورې څخه ترهګرو هڅه وکړه چې په کرمې ایجنسۍ سیمه کښې له ازغن جال څخه پاکستان ته واوړي او د حکومتي عسکرو او د وسله والو کسانو ترمینځ د ډزو په تبادلې کښې دوه حکومتي ملیشا ځواکونه څلرویشت (۲۴) کلن لانس نائیک اسد علي چې د کرمې ایجنسۍ وسیدونکی دی او دغه راز څلرویشت (۲۴) کلن سپاهي اصف چې د لکي مروت سیمې وسیدونکی دی ووژل شول .
وړه شپه دغه راز د خیبر پښتونخوا صوبې په لکي مروت سیمه کښې هم ترهګرو د میانوالي او د لکي مروت ترمینځ لاره کښې د پولیسو په ګزمې برید وکړ چې له کبله یې څلور (۴) پولیس وژل شوي ډي .
په وژل شویو پولیسو کښې ای ایس ايي (ASI) یعقوب خان او د پولیسو غړي مستقیم شاه ، انعام الله او رحیم الله شامل دي .
دغه راز پرون په جنوبي وزیرستان قبایلي سیمه کښې په دریو(۳) بیلابیلو سیمو کښې په بم چاودنو کښې دوه (۲)عسکر وژل شوي او یو(۱) بل ژوبل شوی دی .
