د افغان طالبانو او پاکستان ترمنځ د ترينګلتيا اصلي لامل د ټي ټي پي پر خلاف نه اقدام دی
يوې پاکستانۍ رسنۍ راپور ورکړی چې د پاکستان او افغانستان ترمنځ پوله پرانيستل شوه، خو د افغان طالبانو او پاکستان ترمنځ اساسي کړکېچ لاهم نه دی حل شوی.
د اطلاعات روز ورځپاڼې د خبر له مخې، رسمي سرچينو ايکسپريس ټريبيون ته ويلي، چې د پاکستان او افغان طالبانو ترمنځ د روانې ترينګلتيا اصلي لامل د تحریک طالبان پاکستان (ټي ټي پي) پر خلاف اقدام نه کول دي.
دې پاکستاني رسنۍ زياته کړې چې د پولې د خلاصولو پرېکړه د افغانستان د طالبانو د رهبرۍ تر مداخلې وروسته وشوه.
د افغان طالبانو د بهرنيو چارو سرپرست وزير امير خان مقتي په کابل کې د پاکستان له ډيپلوماټيک پلاوي سره خبرې وکړې.
همدا راز، د افغان طالبانو د کورنيو چارو سرپرست وزير سراج الدين حقاني هم له پاکستان سره اړيکه نيولې او د بشرپالو دلايلو پر اساس يې د دروازې د پرانيستلو غوښتنه کړې.
سرچينې وايي، چې د افغانستان د طالبانو رهبرۍ ضمانت ورکړی چې د افغانستان خاوره به د پاکستان پر ضد نه کاریږي.
