طالبان دې په سمدستي ډول د ترهګرو ډلو پر وړاندې ګام واخلي

د پاکستان د بهرنیو چارو وزارت ویاندې ممتاز زهرا بلوڅ ویلي چې طالبان دې په سمدستي او اغېزناکه توګه د «ترهګرو ډلو» پر وړاندې اقدام وکړي.

زهرا بلوڅ د سلواغې پر ۱۲مه په یوې خبري ناسته کې له طالبانو غوښتي چې د دغو ډلو مشران اسلام‌آباد ته وسپاري.

د نوموړې په خبره، پاکستان د ترهګرو ډلو په تړاو خپلې اندېښنې له طالبانو سره شریکې کړې دي.

په دې وروستیو کې د پاکستان په بېلابېلو سیمو کې د دغه هېواد پر امنیتي ځواکونو بریدونه ډېر شوې دي.

پرون د بلوچستان په مرکز کوټه کې د یوې چاودنې له کبله یو کس وژل شوی او یو بل ټپي شوی دی.

دا په داسې حال کې ده چې د اکسپرېس ټربیون د راپور په حواله، د پاکستان حکومت او ټي‌ټي‌پي د دغه هېواد د ټاکنو د ترسراوي لپاره، د افغان طالبانو په مداخلې نااعلان شوي اوربند ته رسېدلي دي.